71 կողմ ձայներով Վահագն Խաչատուրյանն ընտրվեց Հայաստանի Հանրապետության նախագահի պաշտոնում: Խաչատուրյանի թեկնածությունն առաջադրել էր «Քաղաքացիական պայմանագիր» խմբակցությունը, վերջինս զբաղեցնում էր Բարձր տեխնոլոգիական արդյունաբերության նախարարի պաշտոնը:

Փակ-գաղտնի քվեարկության արդյունքները ներակայացրեց Հաշվիչ հանձնախմբի նախագահ Նարեկ Բաբայանը:

Նիստին ներկա էին միայն քաղաքական մեծամասնության պատգամավորները, նրանք հոտնկայս ծափահարություններով շնորհավորեցին նորընտիր նախագահին: Վահագն Խաչատուրյանը շնորհակալություն հայտնեց վստահության քվեի համար:

Նախագահող Հակոբ Արշակյանը հայտնեց, որ նախագահի ընտրությունից հետո տասներորդ օրը կհրավիրվի ԱԺ հատուկ նիստ, որտեղ նախագահի երդմնակալության արարողությունը կլինի:

Մասնագիտությամբ տնտեսագետ Վահագն Խաչատուրյանը 1992-1996 թվականերին զբաղեցրել է Երևանի քաղաքապետի պաշտոնը, մինչև 1999 թվականը եղել է ԱԺ պատգամավոր:

Եղել է նաև առաջին նախագահ Լևորն Տեր-Պետրոսյանի խորհրդականը: Առաջադրվելուց առաջ Խաչատուրյանը ՀԱԿ-ից դուրս գալու դիմում է ներկայացրել:

Ընդդիմությունը նախագահի ընտրության ինչպես առաջին, այնպես էլ երկրորդ փուլին չմասնակցեց:

Վահագն Խաչատուրյանը Հայաստանի հինգերորդ նախագահն է: Պաշտոնաթող նախագահ Արմեն Սարգսյանը հրաժարականի դիմում էր ներկայացրել 2022թ.-ի հունվարի 23-ին: