Տավուշի մարզի Ազատամուտ համայնքի 15 ներկայացուցիչներ այս պահին Երևանում են՝ հանդիպելու տարածքային կառավարման և զարգացման նախարար Սուրեն Պապիկյանին, ինչպես նաև կրթության և գիտության նախարարության ներկայացուցիչներին:

Նրանց թվում են ավագանու ներկա և նախկին անդամներ, համայնքի միջանակարգ դպրոցի տնօրենը, մանկավարժներ և ծնողներ: Այս մասին «Հետք»-ին հայտնեց Ազատամուտի ավագանու անդամ Արթուր Բեգինյանը:

Նրա փոխանցմամբ՝ այս պահին ևս համայնքում բողոքի ակցիա է, մոտ 400 բնակիչ այս պահին հավաքվել է գյուղապետարանի դիմաց և պահանջում է համայնքապետ Ժորա Մարտիրոսյանի հրաժարականը: Համայնքի աշակերտները այսօր ևս դասի չեն գնացել, որի հանգուցալուծումը այսօր քննարկվելու է կրթության և գիտության նախարարության ներկայացուցիչների հետ:

Հիշեցնենք, որ ազատամուտցիների բողոքի ակցիան սկսվել էր սեպտեմբերի 28-ից: Այն կապված էր նախորդ շաբաթ դպրոցում տեղի ունեցած ծեծկռտուքի հետ, որում ներգրավված են եղել համայնքապետի թոռները: