«Հաց բերող» Արթուր Սարգսյանի մահվան գործով չկա որևէ անձ, ով ենթարկված լինի որևէ բնույթի պատասխանատվության: Հետապնդում չի իրականացվել քննիչների, դատավորների, ՔԿՀ-ների պաշտոնյաների, վերահսկող դատախազի նկատմամբ: Չեն գրանցվել նաև ինքնակամ հրաժարականներ: Գլխավոր դատախազությունը որևէ հանցավոր արարք չի արձանագրել, դատական երկու ատյանները՝ նույնպես: Այժմ նրա փաստաբանների բողոքը Վճռաբեկ դատարանում է: Այս մասին «Հետքին» տեղեկացրեց Արթուր Սարգսյանի իրավահաջորդի ներկայացուցիչ, փաստաբան Դավիթ Գյուրջյանը:

Հիշեցնենք, որ մեկ տարի առաջ՝ մարտի 22-ին Դավիթ Գյուրջյանն ու Տիգրան Եգորյանը Գլխավոր դատախազ Արթուր Դավթյանին էին ներկայացրել հանցագործության մասին հաղորդում, որի պահանջն էր` Արթուր Սարգսյանի մահվան փաստի առթիվ հարուցված քրեական գործով քննություն իրականացնել քննչական խմբի ղեկավար Էդիկ Հակոբյանի, դատարաններում Արթուր Սարգսյանի կալանավորման միջնորդությունները ներկայացրած և պաշտպանած քննչական խմբի անդամ քննիչների, դատախազական հսկողություն իրականացնող դատախազ Պետրոս Պետրոսյանի, կալանքի միջնորդությունները և դրանք բավարարելու մասին որոշումների դեմ ներկայացված բողոքները քննած նախագահող դատավորների, «Նուբարաշեն» և «Դատապարտյալների հիվանդանոց» ՔԿՀ-ների վարչակազմի կողմից պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական անփութության, Արթուր Սարգսյանին խոշտանգելու, վերջինիս ապօրինի ձերբակալելու և ապօրինի կալանավորման փաստերի առթիվ:  

Փաստաբան Դավիթ Գյուրջյանը «Հետքին» ասաց, որ առհասարակ ոչ թե մերժվել է քրեական գործի հարուցումը, այլ պարզապես չի ընդունվել որպես հանցագործության մասին հաղորդում: Գլխավոր դատախազության մերժման հիմքում դրված է այն, որ գործի շրջանակում որևէ փաստական հիմք չի հայտնաբերվել, որը թույլ կտար դատավորների, քննիչների, ՔԿՀ պաշտոնյաների նկատմամբ քրեական հետապնդում նախաձեռնել: Ըստ փաստաբանի` մերժման մեջ արձանագրված է նաև, որ եթե գործի նախաքննության ընթացքում որևէ հանգամանք վկայի իրենց բողոքում մատնանշած կետերի մասին, այդ ուղղությամբ քննություն կլինի:

Փաստաբաններն այդ պատասխանը բողոքարկել են նախ` Գլխավոր դատախազին, ապա դիմել առաջին ատյանի դատարան: Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը նշել է, որ փաստաբանների դիմումի մեջ միայն վարույթն իրականացնող մարմնի գործողություններն են թվարկված և դրանց առնչությամբ սուբյեկտիվ մեկնաբանություններ: Ուստի, որոշել է մերժել փաստաբաններ Եգորյանի ու Գյուրջյանի բողոքը: Վերաքննիչ դատարանը նույնպես մերժել է նրանց բողոքը:  

Ինչպես հայտնի է, Արթուր Սարգսյանի մահվան փաստով քրեական գործը հարուցվել է միայն քրեական օրենսգրքի 130-րդ հոդվածով՝ բժշկական սխալի փաստի առթիվ: Այս հանգամանքը, ըստ Արթուր Սարգսյանի պաշտպանների, նշանակում է, որ նախաքննությունը սահմանափակվել է հենց հարուցման փուլում`քննության շրջանակներից դուրս թողնելով հարցերի մի հսկայական շարք, որոնք վերաբերում են Արթուր Սարգսյանի նկատմամբ կիրառված կալանավորման և պահման պայմանների ազդեցությանը, պատշաճ բուժօգնությանը, նրա առողջական վիճակին պատշաճ ուշադրությանն ու հաշվառմանը: Այսպիսով, ի սկզբանե բացառված է եղել Արթուր Սարգսյանի մահվան գործով բազմակողմանի, լրիվ և օբյեկտիվ քննությունը: