2012-ի աշուն-ձմեռ հավաքածուի մեջ նորաձև է լինելու 70-ականների ոճը. կգերակշռի վինտաժը՝ երբ թվացյալ հին հագուստն իրականում նոր է: Նորաձև են մեղմ գույները՝ կարամելի, թարմ մեղրի, դդմի, դարչինի, շոկոլադի: Իսկ գարուն-ամառ հավաքածուի մեջ կգերակշռի 20-ականների ոճը: Տարվա այս եղանակների նախընտրելի գույնն է դեղինը: Գեղեցիկ կլինի նաև նարնջագույնը, սակայն պետք չէ այն չարաշահել:

Այս մասին այսօր՝ լրագրողների հետ հանդիպման ժամանակ, պատմեց նորաձևության հայկական խորհրդի անդամ, դիզայներ Լիլիթ Մարգարյանը: Նա նշեց, որ 2012թ.-ին նորաձև են բնական կտորները, գործվածքները, մեջքի լայն բացվածքով հագուստները, ինչպես նաև փայլփլուն, վառ գույները:

Կանանց համար նորաձև են նաև տաբատները, որոնք իրենց շքեղությամբ համազոր կլինեն երեկոյան զգեստին, ինչպես նաև մեծ օձիքներն ու երկար թիկնոցները, «բիզնես ոճը»:

Դիզայների խոսքերով՝ «տարվա հիթ» է համարվում գործնական հանդիպումների ժամանակ հագուստին համապատասխան գույնի նեթբուքով ներկայանալը:

Նորաձև են լինելու կոպիտ կոշիկները՝ հաստ կրունկներով, դասական պայուսակները, «ձիու պոչ» կոչված սանրվածքը՝ բաց ճակատով:

Տղամարդկանց համար նորաձև են զինվորական նախշերով հագուստները, բազմաշերտ, մորթե, կաշվե հագուստները: Իսկ գերակշռող գույնը կլինի մոխրագույնը՝ զուգակցված վառ գույներով:

Այնուամենայնիվ, դիզայները համոզված է, որ գերակշռելու են ռետրո ոճի, ծաղկավոր ու փոռիկներով զգեստները, իսկ 2012թ.-ը լինելու է կանացիության ու ռոմանտիզմի տարի:

Լուսանկարը՝ style-files.com կայքից