«Սասնա Ծռեր» խմբի անդամների ընտանիքները հայտնվել են սոցիալական վատ վիճակում՝ հաշվի առնելով այն, որ ընտանիքի միակ կերակրողներն այժմ անազատության մեջ են: Իսկ նախաքննական մարմինը, որը օրենքով պարտավոր է պետական բյուջեի հաշվին փոխհատուցել ընտանքիների խոցելի խմբերի խնամքը, չի շտապում կիրառել օրենսդրությունը (Քր.դատ. օր. 140 հոդված)  

Ուստի Հայաստանում ու արտերկրում կամավորների, անհատ քաղաքացիների կողմից կազմակերպվում են տարբեր դրամահավաքներ: Հիշեցնենք, որ արտերկրից ավելի քան 20.000 ԱՄՆ դոլար հավաքվեց Խանդոյանների ընտանիքի համար, որոնք ապրում են ծայրահեղ վատ պայմաններում: 

Մի խումբ կամավորներ՝ Նելլի Մինասյանի գլխավորությամբ, օգոստոսի 2-ից Երևանի Հյուսիսային պողոտայում պարբերաբար դրամահավաք են կազմակերպում: Հավաքված գումարները նրանք փոխանցում են «Սասնա Ծռեր» խմբի անդամների կամ այդ գործով կալանավորվածների ընտանիքներին:

Օգոստոսի 18-ին դարձյալ դրամահավաք է. այս անգամ գումարը փոխանցվելու է հուլիսի 31-ին ՊՊԾ գնդի տարածքում կրծքի շրջանում հրազենային վիրավորմամբ «Էրեբունի» ԲԿ տեղափոխված, վիրահատված, ապա կալանավորված ու հիմա «Դատապարտյալների հիվանդանոցում» գտնվող Սեդրակ Նազարյանի ընտանիքին:  Սեդրակի ընտանիքի միակ եկամուտը 42 հազար դրամ թոշակն է:

Հիշեցնենք, որ Սեդրակ Նազարյանին մեղադրանք է առաջադրվել քրեական օրենսգրքի 218-րդ հոդվածի 3-րդ մասի 1-ին կետով` պատանդ վերցնելը, 219-րդ հոդվածի 3-րդ մասի 1-ին կետով` շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածի 3-րդ մասով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը։

Վերջին դրամահավաքը կամավորները կազմակերպել էին օգոստոսի 12-ին և 13-ին: հավաքված գումարը փոխանցվել է Արցախյան պատերազմի մասնակից Մհեր Մազմանյանի բազմազավակ ընտանիքին: Հուլիսի 26-ին «Սասնա ծռեր» խմբին օժանդակելու կասկածանքով ձերբակալված ազատամարտիկ Մհեր Մազմանյանը  խնամքին ունի վեց անչափահաս երեխաներ: Մհերը ընտանիքի միակ աշխատող է եղել: Մհեր Մազմանյանը ապրիլյան պատերազմին նույնպես եղել է ռազմի դաշտում: Տան միակ աշխատողն այս պահին ավտոլվացման կետում աշխատող նրա 15 տարեկան տղան է:

Նելլի Մինասյանը մեզ հետ զրույցում նշեց, որ դրամահավաք է կազմակերպվել նաև Արմեն Լամբարյանի ընտանիքին օգնելու նպատակով, քանի որ գտնվում է ծանր կացության մեջ: Լամբարյանը նույնպես Արցախյան պատերազմի մասնակից է, երկրորդ կարգի հաշմանդամ, ունի երեք անչափահաս երեխա, մայրը նույնպես հաշմանդամություն ունի:

Հյուսիսային պողոտայում դրամահավաքները սկսվել են օգոստոսի 2-ից՝ Պավել ու Արամ Մանուկյանների ընտանիքին աջակցելու նպատակով:

Նելլի Մինասյանը նշեց, որ շատ մարդիկ են աջակցել իրենց նախաձեռնությանը, բոլոր ակցիաների ժամանակ նվագել է կիթառահար Ելենան, պարել են տարբեր քաղաքացիներ, ոգևորել մարդկանց ու կանչել Հյուսիսային պողոտա: