Դեռ անցած տարվա հոկտեմբերին կառավարությունը որոշում ընդունեց, որով պարտավորվեց մանկական սնունդ, հագուստ ու խաղալիք տրամադրել անազատության մեջ գտնվող այն կանանց, որոնք կալանավայրում խնամում են մինչեւ երեք տարեկան երեխաների: Անցել են ամիսներ, սակայն մինչ օրս ազատազրկված կանայք այդ օգնությունը չեն ստացել:

Արդարադատության նախարարության քրեակատարողական վարչության հանրային կապերի բաժնի պետ Գոռ Ղլեչյանի խոսքով` այժմ «Աբովյան» քրեակատարողական հիմնարկում կա 173 կին, որոնցից մեկն իր խնամքի տակ ունի մինչև երեք տարեկան երեխա: Քրեակատարողական հիմնարկներում հասարակական վերահսկողություն իրականացնող դիտորդական խմբի անդամներն արձանագրել են, որ երեխայի համար նախատեսված պարագաները մինչ օրս կալանավայր չեն հասել: Թե ինչու, պաշտոնապես չի հստակեցվում: ԱՆ-ն ընդամենը նշում է, որ անհրաժեշտ պարագաները կտրվեն սեղմ ժամկետում` առանց հավելյալ մանրամասներ ներկայացնելու:

Կալանավայրերում դիտորդություն իրականացնող խումբը նաև առաջարկել էր, որ դատապարտյալ կանանց տրվի ևս մեկ ստացիոնար ավտոմատ-հեռախոս ունենալու հնարավորություն: Առայժմ նրանք իրավունք ունեն շաբաթական ընդամենը 3-4 անգամ 15 րոպեով զրուցել ընտանիքի անդամների հետ, ինչը, ըստ դիտորդների, բավարար չէ ազատության մեջ երեխա ունեցող մայրերի համար: Այդ հարցին ի պատասխան եւս արդարադատության նախարարությունից նշել են, թե  «ձեռնարկում են միջոցներ` սեղմ ժամկետում հարցը լուծելու ուղղությամբ»՝ կրկին առանց հստակ ժամկետներ նշելու։

Լիլիթ Շաբոյան

ԵՊՀ, ժուռնալիստիկայի ֆակուլտետ, 4-րդ կուրս