Այսօր մամուլի ասուլիսի ժամանակ հայտնի գործարար Սիլվա Համբարձումյանը հայտարարել է, թե ինքն էլ է շաքարավազի ներկրմամբ զբաղվում եւ 1 տոննան 488 դոլարով վաճառում է արաբական երկրներին: Ըստ Ս. Համբարձումյանի՝ եթե Հայաստանում մաքսավճարն էլ գումարվի ներկրվող շաքարավազին, ապա 1 կգ-ի արժեքը կլինի մոտ 60 ցենտ` մոտ 230 դրամ: Նա նաեւ ասել է, թե ոչ մեկին խորհուրդ չի տա օգտագործել Հայաստանի շաքարավազը, որովհետեւ առողջության համար շատ վտանգավոր է. Եւ հնարավոր է «շաքար հիվանդություն առաջացնի»:

«Հետքը» զրուցեց շաքարի ներկրման մենաշնորհ ունեցող գործարար պատգամավոր Սամվել Ալեքսանյանի հետ: Ստորեւ ներկայացնում ենք զրույցն ամբողջությամբ:

Բարեւ Ձեզ, պարոն Ալեքսանյան:

Ալեքսանյանը չի, ով ա՞:

Ես լրագրող եմ, ու Ձեր ձայնն էլ նման է պարոն Ալեքսանյանի ձայնին:

Ո՞ր թերթից ես:

«Հետք»:

Ցավդ տանեմ, Ալեքսանյանը չի, որ մի ժամից զանգես Ալեքսանյանը կվերցնի:

Ընդամենը մեկ հարց ունեմ:

Ախպերս, եթե կարենամ կպատասխանեմ, ասա՝ ի՞նչ ասեմ:

Այսօր գործարար Սիլվա Համբարձումյանը մամուլի ասուլիսում հայտարարել է, որ Հայաստան ներկրվող շաքարավազը անորակ է ու թանկ, եւ ինքը կարող է 230 դրամով շաքարավազ ներկրել Հայաստան:

Ով ա ասե՞լ:

Հանքարդյունաբերության ոլորտում հայտնի գործարար Սիլվա Համբարձումյանը:

Եթե կարա բերի, թող բերի, խի՞ չի բերում:

Իսկ շաքարավազի որակի մասով ի՞նչ կասեք:

Ցավդ տանեմ, ես չեմ իմանում՝ ինքն ինչ ա ասել, ինչ չի ասել: Եթե կարա ինքը բերի, թող բերի:

Իսկ Հայաստան ներկրվող շաքարավազը լա՞վ որակի է:

Մենք Հայաստան պատրաստի պեսոկ չենք ներկրում, մենք բերում ենք հումքը:

Այդ դեպքում ասեք, թե ի՞նչ որակի է Հայաստանում արտադրվող շաքարավազը:

Շատ նորմալ պեսոկ ա, կարող եք գնալ խանութներից գնեք, նայեք:

Իսկ այն գնով, որ այսօր շաքարավազը վաճառվում է, թանկ չի՞:

Դուք կարաք ուրիշ տեղերից էլ ճշտեք, ասենք` Վրաստանում ինչ արժի, ստեղ ինչ արժի:

Զրույցն ավարտելուց մոտ երկու րոպե անց հետ զանգեց Սամվել Ալեքսանյանը եւ հետաքրքրվեց, թե ո՞վ է Սիլվա Համբարձումյանը եւ կոնկրետ որտե՞ղ է նման հայտարարություններ արել: «Լավ, լավ, լավ, իմացա, թե ով ա Սիլվա Համբարձումյանը: Ասել ա, որ 230 դրամով պեսոկ կբերեմ հա՞: Լավ, եղավ»:

Հ. Գ. Նշենք, որ Սամվել Ալեքսանյանին զանգահարել էինք այլ հեռախոսահամարից, որպեսզի չխուսափի հեռախոսազանգին պատասխանելուց: