«Ծաղկաշատ–Ախետքի» պղինձ-մոլիբդենային  հանքային դաշտի տեղամասում  օգտակար հանածոների արդյունահանման նպատակով ընդերքի երկրաբանական ուսումնասիրություն կատարելու «Թեղուտ»  ՓԲԸ-ի նախագահ Վալերի Մեջլումյանի գրավոր  առաջարկությունը Ծաղկաշատում խուճապ  է   առաջացրել: Ծաղկաշատn ունի 271 բնակիչ ունի:  

«Ծաղկաշատում հանք բացելը շատ վտանգավոր ա:  Ծաղկաշատցիք հանք բացելուն դեմ են: Բաց հանք է լինելու, ոնց կարող են գյուղացիները համաձայն լինել: Մեզ աշխատատեղ պետք  չի էս  սարի ծերին: Էսօր գնում են Թեղուտ աշխատում, գալի, մարդը 12 ժամ տանից դուրս եկած է: Իրա տունը հյուրանոցի  նման է: Գալիս է քնում ու առավոտը ծեգին էլի գնում:Մեր անտառը մալինեն տալիս է, մոշը  տալիս է, մասուրը տալիս է, սունկ է տալիս: Մարտ ամսից սկսած մինչև նոյեմբերի վերջը անտառով, բացի  անասնապահությունն  ու հողագործությունը, լիարժեք  մեր գյուղացիները  ապրում են: Մեզ ոչ մի անգամ էդ  հանքարդյունաբերությունը  ձեռք չի  տալիս»,-ասում է գյուղապետ  Հրաչիկ Պարանյանը:

Վերջինս հպարտությամբ ասում է, որ Ծաղկաշատը տարածաշրջանի այն եզակի համայնքներից է, որ էկոլոգիապես մաքուր սնունդ է ստանում: «Մեր լեռնային աղբյուրների անկրկնելի ջրերը պետք չէ կեղտոտել: Հանքային ջրեր ունենք: Մեր չնաշխարհիկ բնության մեջ աշխատատեղեր կարելի է ստեղծել միայն հանգստի գոտիներ ստեղծելով: Ծաղկաշատում  «Մաուգլի» հանգստյան գոտի ունենք, որ մարդիկ ամռանը գալիս են`տեղ չի լինում: Հանգստացողները նույնիսկ համաձայնում են վրաններում մնալ: Էդ մարդիկ, բնությունից հիացած, օգտվում են  մեր էկոլոգիապես մաքուր սննդից: Էն որ ասում են համայնքապետը հանքի բացման համաձայնություն է տվել, դա եղել  է ընդամենը մեր տարածքով երկրաբանների քայլելու համար»,- բացատրեց Հ.Պարանյանը:

Գյուղապետի ասելով՝ եթե գյուղում  հանք բացեն, դա կնշանակի գյուղը հանեն իր տեղից: Հրաչիկ Պարանյանը նաև  հիշեցնում է, որ ինքը որպես գյուղապետ համայնքի բնակիչների կողմից ընտրվող մարդ է և պետք չէ իր  անունի հետ խաղալ։ «Ես Վալերի Ջանիբեկիչի հետ անձամբ  կհանդիպեմ, ինքն այս գյուղացի է, գյուղի  համար արած բաներ շատ ունի, մենք չենք  ուրանում, միշտ մեզ լավ ընդունել է: Ինձ թվում է՝ էս հարցի առաջը պետք է փակվի, գյուղի 98 տոկոսը դեմ է հանքին»,- հայտնեց գյուղապետը:  

Հ. Պարանյանը նաև հիշեց, որ Վալերի Մեջլումյանը մի  քանի տարի առաջ գյուղում ասել է, թե Ծաղկաշատում այնքան բնական, այնքան տաք ու սառը ջրեր ունեն, որ տուրիզմով ինքը գյուղը կապահովի: