«Հայաստան» համահայկական հիմնադրամի ծրագրերի եւ արտաքին կապերի բաժնի պետ Վարդան  Փարթամյանն ասաց, որ շուտով` նոյեմբերի վերջին, հիմնադրամը Շվեյցարիայից ներկրելու  է 50 տոհմային, կաթնատու սորտի երինջ, որոնք   բաժանվելու են Տավուշի մարզի Իջեւանի տարածաշրջանի  10-14 գյուղերում: Դա  համահունչ է լինելու  Ազատամուտում կաթի հավաքման  կետի ծրագրին: Եթե կովկասյան գորշ տեսակի կովը  տարեկան տալիս է 1500 լ. կաթ, ներկրվող կովերը ` 7000 լ. կաթ: Դրա հետ մեկտեղ իրականացվելու են անասունների տոհմային կազմի  բարելավման, կերային մշակաբույսերի զարգացման աշխատանքներ, լինելու է համապարփակ ծրագիր: Հիմնադրամի ծրագրերի եւ արտաքին կապերի բաժնի պետի խոսքով` այդ բոլոր բաղադրիչները համահունչ են  նույն նպատակին` գյուղացու կյանքի բարելավմանը: 2007թ. հոկտեմբերի 12-ից հիմնադրամը սկսել է Գյուղերի զարգացման ծրագիրը: Տավուշի մարզի 6 գյուղեր` Ազատամուտը, Լուսաձորը, Լուսահովիտը, Դիտավանը, Ակնաղբյուրը եւ Խաշթառակը այդ ծրագրի առաջին շահառուներն են:  «Հայաստան» հիմնադրամի վեբ-կայքում  նշված է. «Գյուղերի զարգացման ծրագիրը նպատակ ունի վերականգնել Հայաստանի սահմանամերձ համայնքները»: Մինչդեռ այդ 6 գյուղերից միայն Ազատամուտը, որոշ վերապահումներով նաեւ` Դիտավանը կարելի է սահմանամերձ համարել: Չնայած Տավուշի մարզի  բոլոր գյուղերն էլ ենթակառուցվածքների բարելավման, աջակցության կարիք ունեն: - Այդ 6 գյուղերից որո՞նք եք համարում իսկապես սահմանամերձ,-հարցրի Արամ Փարթամյանին:  - Շատ բարդ հարց եք տալիս: -Հարցը բարդ չէ: Օրինակ` Տավուշի մարզի Կիրանցը, Բերքաբերը, Բարեկամավանը, իսկապես, սահմանամերձ գյուղեր են, Խաշթառակը, Լուսաձորը կամ Ակնաղբյուրը սահմանից բավականին հեռու են: -Եթե չեմ սխալվում, գրադացիայով սահմանից մինչեւ 10-12 կմ հեռավորությամբ  սահմանամերձ են համարվում: Դիտավանը սահմանից 2 կմ հեռավորությամբ է գտնվում: Ընդհանրապես, գրադացիայի կարիք չկա, գյուղերը մնում են գյուղեր, օգնությունը մնում է օգնություն: Եվ մենք հույս ունենք մի օր այնքան ծավալել ծրագիրը, որ բոլոր այդ գյուղերին կարողանանք օգնել: Բերքաբերն  ընգդրկված է գյուղերի զարգացման ծրագրում եւ արդեն գյուղատնտեսական աջակցություն    է ստանում «Հայաստան» համահայկական հիմնադրամից: Այս պահին  այդ գյուղի ենթակառուցվածքների ծրագրերով ենք զբաղվում, ուսումնասիրություններ  կատարում: