Երեկ երեկոյան ՀՀ ոստիկանության  Լոռու մարզի Թումանյանի բաժնում  «Հետքին» տեղեկացրին, որ  որ Ախթալայի «Մեթըլ Փրինս» կորպորացիայի սեփականատեր, Ամերիկայի քաղաքացի Սերոբ Տեր-Պողոսյանի դատաքննության փուլում գտնվող մանկապղծության գործով տուժողներից մեկը, ով խուսափել է զինծառայությունից  և գտնվել է հետախուզման մեջ,  ձերբակվել է ոստիկանության կողմից:

Նա սեպտեմբերի 20-ին  տեղափոխվել է Վանաձորի քրեակատարողական հիմնարկ, որտեղ ներկայումս գտնվում է նաև  Սերոբ Տեր-Պողոսյանը:  ՀՀ  Լոռու մարզի քննչական  վարչության  Թումանյանի քննչական բաժնի պետ, ոստիկանության փոխգնդապետ  Ռուդոլֆ Ստեփանյանը  հայտնեց, որ ձերբակալվածը զինծառայությունից խուսափել է առանց օրենքով սահմանված կարգով ազատված լինելու, և նրա դեմ քրեական գործ է հարուցվել ՀՀ  Քր.օր.-ի 327 հոդվածի առաջին մասով: Զինծառայությունից խուսափողին կալանքի վերցնելու համար քննիչը դիմել է դատարան: Միջնորդությունը քննարկվել է  Լոռու մարզի  ընդհանուր իրավասության դատարանի Ալավերդու նստավայրում, և հետախուզվողի նկատմամբ  դատարանի վճռով  երկու ամսով կալանքի վճիռ է կայացվել, որից հետո սեպտեմբերի 20-ին  նա տեղափոխվել է Վանաձորի քրեակատարողական հիմնարկ:

«Երկու ամսվա ընթացքում, գուցե նաև ավելի վաղ, եթե անձը ցանկություն է հայտնում բանակ մեկնելու, նրա վերաբերյալ քրեական գործը կարճվում է:  Որպես հետախուզվողի մենք ենք նրան հայտնաբերել, եթե ինքը կամովին ներկայանար և մեկներ բանակ, կալանավորելու խնդիր չէր առաջանա»,- ասաց  Թումանյանի քննչական բաժնի պետը, ով «Հետքից» տեղեկացավ  զինծառայությունից խուսափողի՝ նաև Սերոբ Տեր-Պողոսյանի գործով տուժող լինելու մասին:  

«Քանի որ Սերոբ Տեր-Պողոսյանի քր. գործը մեր վարույթում չի եղել, ես տեղյակ չեմ եղել նրա  տուժող լինելու փաստին:  Տեղեկանալուց հետո այժմ ես պաշտոնական գրություն կուղարկեմ քրեակատարողական հիմնարկի ղեկավարին` տուժողի մեկուսացվածությունը ապահովելու համար»,- ասաց Ռուդոլֆ Ստեփանյանը:  Քրեակատարողական հիմնարկում  տուժողի մեկուսացվածության  մասին տեղեկատվություն ստանալու նպատակով  սեպտեմբերի 21-ին մեր հեռախոսազանգին Վանաձորի քրեակատարողական հիմնարկի հերթապահ  Սամվել Աբովյանը պատասխանեց. «Կալանավորի մեկուսացումը ապահովված է, սակայն Ձեզ այլ տեղեկություններ չեմ կարող հայտնել, որովհետև իրավունք չունեմ»: Քրեակատարողական հիմնարկի ղեկավար  Արտյոմ Մխոյանի հեռախոսահամարը մեզ փոխանցելու խնդրանքին Սամվել Աբովյանը պատասխանեց, որ այդ իրավունքը նույնպես չունի: