ԱԺ պատգամավոր Զարուհի Փոստանջյանն ընդդեմ ՀՀ ոստիկանության Երեւան քաղաքի վարչության պետ Ներսես Նազարյանի գործի քննությունն այսօր անցավ Հայաստանի թերեւս ամենափոքր դատական նիստերի դահլիճում:

Կենտրոն եւ Նորք-Մարաշ վարչական տարածքի դատարանում մի փոքրիկ սենյակ էին հատկացրել գործի քննությունն անցկացնելու համար:

Դատավոր Էդիկ Ավետիսյանի գլխավերեւում բացակայում էր Հայաստանի Հանրապետության զինանշանը, բացակայում էր նաեւ պետական դրոշը, բայց դատական նիստը, այնուամենայնիվ, կայացավ:

Հաշվի առնելով որ հայցվորը Ազգային Ժողովի պատգամավոր է, իսկ պատասխանողը Երեւան քաղաքի ոստիկանապետը` դատարանի նախագահը կարող էր կռահել, որ այս գործը հասարակական հետաքրքրություն է առաջացրել, եւ որ գործի քննությանը ներկա կլինեն նաեւ լրագրողներ, ուստի գործը պետք է քննվեր համեմատաբար ընդարձակ դահլիճում:

Մինչդեռ թիվ 6 դահլիճում նույնիսկ պատասխանողի առջեւ սեղան չկար դրված, իսկ դատավարությանը ներկա անձինք նստել էին հայցվոր Փոստանջյանի ու նրա փաստաբանի կողքը, լրագողները` Երեւանի ոստիկանապետի ներկայացուցչի կողքը: Ներկաներից մի մասն էլ կանգնած էին հետեւում դատավարությանը:

Ահա այսպիսի պայմաններում էր դատավոր Էդիկ Ավետիսյանը փորձում վերականգնել պատգամավորի եւ բողոքի ակցիաներին մասնակցած մյուս անձանց իրավունքները: