Երեւանի Չարենցի փողոցի «Այգեստան» խանութի վաճառողուհին մեր հարցին, թե ունե՞ն արդյոք սննդամթերքի պիտանելիության եւ ժամկետը հաստատող փաստաթղթեր, պատասխանեց` պետական գաղտնիք է: «Սպառողների շահերի պաշտպանության մասին» ՀՀ օրենքի 9-րդ հոդվածի առաջին կետի համաձայն` վաճառողը պարտավոր է խանութի աշխատանքային ռեժիմի, իրացվող ապրանքների վերաբերյալ անհրաժեշտ եւ ստույգ տեղեկատվություն ներկայացնել սպառողին, եթե վերջինս պահանջում է նման տեղեկություն:

Երեւանի կենտրոնում գտնվող մեր այցելած բոլոր խանութներում հրաժարվեցին տրամադրել նման տեղեկատվություն: Աբովյան փողոցի «Ուրարտու» խանութում վաճառողուհին բարկացած պատասխանեց` գոյություն ունի ապրանքագետ, որն էլ զբաղվում է պիտանելիության, ժամկետի եւ այլ փաստաթղթերով, իսկ ապրանքագետը խանութում չէր: Տերյան փողոցի անանուն խանութի վաճառողուհին ասաց. «Ես չգիտեմ, դա իմ գործը չէ»: Գրիգոր Լուսավորիչ փողոցի «Պատուհան» խանութի վաճառողի պատկերացմամբ էլ իրենց մթերքների պիտանելիության եւ ժամկետի երաշխիքն իրենք են:

Այդ խանութներում վաճառվող ապրանքներից շատերի վրա նշված չէր կա՜մ օգտագործման, կա՜մ արտադրման ժամկետները: «Դարոինկ» ֆիրմայի եգիպտացորենի ձողիկների կամ «Կլասիկ» սուրճի փաթեթների վրա չկային վերոնշյալ տեղեկությունները: «Օգտագործելով ժամկետանց, անորակ սնունդ, առաջին հերթին մենք վնաս ենք հասցնում մեր առողջությանը` «վաստակելով» տարբեր հիվանդություններ, հիմնականում` քաղցկեղ, սնկային հիվանդություններ, իմունիտետի անկում»,- ասում է Սպառողների շահերի պաշտպանության միության նախագահ Աբգար Եղոյանը:

Ըստ ՀՀ կառավարության 1998թ. թիվ 35 որոշման 6-րդ կետի` խանութի ճակատային մասում` գնորդներին տեսանելի տեղում, պետք է փակցվի ցուցանակ, որտեղ նշվում են խանութի ֆիրմային անվանումը, իրավաբանական հասցեն եւ աշխատանքային ռեժիմը: Մեր այցելած խանութներից չորսը չունեին անվանում: Իսկ ինչ վերաբերում է խանութի տեսակին, աշխատանքային ռեժիմին եւ հասցեին, ապա այցելած 10 խանութներից եւ ոչ մեկում այս տեղեկությունները պարունակող ցուցանակ չկար:

Խանութներից ոչ մեկի գնորդները չգիտեին իրենց իրավունքները: Աբգար Եղոյանի կարծիքով. «Եթե համեմատենք անցած տարիների հետ, տարբերությունն ակնհայտ է: Հիմնական փոփոխությունը ոչ թե շուկայում է, այլ մարդկանց հոգեբանության մեջ: Նրանց արդեն հետաքրքրում է իրենց օգտագործած սննդամթերքի որակը, ժամկետը, պիտանելիությունը: Կարծում եմ` սա պակաս նվաճում չէ: Սպառողների միության նախագահ Արմեն Պողոսյանն ասում է. «Եթե մենք` սպառողներս, խանութներում վաճառողներից պահանջենք հարգել մեր իրավունքները, վաճառողը, արտադրողը ստիպված կլինի պաշտպանել դրանք»: