«Հետքի» հարցերին պատասխանում է ԱԺ ՀՀԿ խմբակցության ղեկավար, պատգամավոր Գալուստ Սահակյանը:

Այս օրերին խորհրդարանում հիմնական թեման «բյուջե 2013»-ն է: Ընդդիմադիրները, կառավարության պնդումներին, թե գումարներ չկան, հակադարձում են, որ երկրում գումարներ կան, պարզապես նպատակաուղղված չեն ծախսվում…

Իհարկե, լուրջ ընդդիմադիր ելույթներ էլ եղան, բայց հիմնականում դրանք արհեստական ակտիվացումներ են, պարզից էլ պարզ է: Երբեմն մեզ մեղադրում են, որ ինչ անում ենք, նախապատրաստվում ենք իբր նախագահական ընտրություններին: Եթե այդ հնարավորությունը լիներ, դրանից մեծ կռվան չէր լինի, եւ նվազագույն աշխատավարձը կբարձրացնեինք, աշխատավարձերը կբարձրացնեինք: Հասարակությունն այդ առումով պիտի տարբերություն տեսնի:

Մենք վճռական ենք եւ պետության հաշվին, մեր իշխանության հաշվին առանձին պոպուլիզմով հանդես չենք գալիս ցանկացած ընտրության դեպքում: Բնական բան եմ ասում ու նորից պիտի կրկնեմ, որ կռվան չէր լինի, կբարձրացնեինք աշխատավարձերը եւ ոչ միայն նվազագույնը: Մենք ասում ենք, որ ճգնաժամից հետո սա այն հիմքն է, որն ապահովելու է իմ ասածը, եւ կառավարության միջնաժամկետ ծրագրով էլ կա, որ 2014-15թթ. կրկնապատկվելու է աշխատավարձերը եւ թոշակները:

Ձեր կարծիքով` 2500 դրամով նվազագույն աշխատավարձի բարձրացումը համահու՞նչ է այսօրվա իրողությանն ու գնաճին:

Իհարկե ոչ: Բայց մենք ոչ թե ցանկություններով ենք առաջնորդվում, այլ իրավիճակով, որն ամբողջ աշխարհինն է, միայն մերը չէ:

Հայաստան զգալի գումարներ են գալիս՝  սկսած տրանսֆերտներից: Ինչո՞ւկառավարությունը չի կարողանում գոնե նվազագույն սպառողական զամբյուղի շեմն ապահովել քաղաքացիների համար:

Ոչ թե պետությունը կամ իշխանությունները չեն կարողանում, այլ տնտեսական զարգացման կարգերը ոչ միայն Հայաստանում, այլեւ ամբողջ աշխարում տնտեսական ճգնաժամի պատճառով ինչ-որ չափով փլուզվեցին: Հիմա պետություններ կան, նույնիսկ եվրոպական հարուստ պետություններ, որ ճանապարհներ ունեն, բոլոր հիմքերը կան, բայց նրանք էլ են արդեն վատ վիճակում: Մենք պատերազմող երկիր ենք, ինչ ունենք՝ դա ուզում ենք օգտագործել, որպեսզի ամբողջովին չփլուզվի երկիրը: Մենք համոզված ենք, որ այս բյուջեն այդ հիմքն ու կուլմինացիան է: Այն ցանկությունները, որ հնչում է ընդդիմությունից, մեր նպատակն էլ է, որ հետագայում հենց այդպես լինի:

Իհարկե, հնարավորություններ կան. կարող ենք այսօրվա ստեղծածը քանդել մի 6-7 ամսով աշխատավարձեր, թոշակներ բարձրացնել, բայց դրանից հետո մենք կդառնանք ամենաանլուրջ պետությունը:

Արդյո՞ք Ձեր նշած տեմպերով առաջ գնալը չէ պատճառը, որ ունենք մեծ արտագաղթ:

Դա այլ խնդիր է, առանձին հարցազրույցով կասեմ: Արտագաղթը դոգմատիկ երեւույթ չի կարելի դարձնել: Դա իր բազմակողմանի վերլուծականներն ունի: Իհարկե, դա էլ է օգտագործվում մեր ընդդիմախոսների կողմից: