Դավթաշեն վարչական շրջանի Անաստաս Միկոյան 64 հասցեի բնակիչները Երևանի քաղաքապետարանից ստացել են իրենց հուզող հարցերից մեկի պատասխանը՝ համաձայն հաստատված Երևան քաղաքի գլխավոր հատակագծի՝ Անաստաս Միկոյան հ.64/7 հասցեում գտնվող, բայց կառուցապատողին փոխկապակցված մեկ այլ ընկերությանն օտարված 0,4 հա հողամասը ներառված է ընդհանուր օգտագործման գոտում։

Հիշեցնենք՝ Անաստաս Միկոյան 64 հասցեում կառուցված և բնակելի 6 շենքից բաղկացած համալիրի բնակիչներն ահազանգել էին, որ իրենցից խլում են իրենց պատկանող՝ ընդհանուր բաժնային սեփականությունը։ Կառուցապատող «Ն ԵՎ Ս Քոնսթրաքշն» ՍՊԸ-ն նախագծով ծանրաբեռնված և կանաչապատման ու բարեկարգման համար նախատեսված 0,4 հա հատված առանձնացրել էր, այնուհետև վաճառել իրեն փոխկապակցված մեկ այլ ընկերության՝ «ԿԱԷՌ Մայնինգ» ՍՊԸ-ին։

Քաղաքապետ Տիգրան Ավինյանն էլ թույլ էր տվել նախագծով ծանրաբեռնված և կանաչապատման ու բարեկարգման համար նախատեսված տարածքը օտարել. Ավինյանն այդ հատվածին առանձին հասցե էր տրամադրել՝ Միկոյան 64/7 հասցեով, իսկ Կադաստրի կոմիտեն իր հերթին, առանց գնորդների համաձայնությունը ստանալու, գնորդների գնման իրավունքներով ծանրաբեռնված հողամասի առանձնացված մասը գրանցել էր որպես առանձին գույքային միավոր։

2024 թվականի ապրիլի 16-ին Անաստաս Միկոյան 64 հասցեի բնակելի թաղամասի բնակիչների, թաղամասի կառուցապատող «Ն ԵՎ Ս Քոնսթրաքշն» ՍՊ ընկերության ներկայացուցիչների և Երևանի քաղաքապետ Տիգրան Ավինյանի հետ տեղի ունեցած հանդիպումից հետո բնակիչները քաղաքապետարանին հարցում էին ուղարկել։

Համաձայն ստացված գրության՝ նշված հասցեում կառուցապատման նպատակով նոր թույլտվությունների տրամադրումը կհակասի գործող օրենսդրությանը։

Հիշեցնենք՝  «Ն ԵՎ Ս Քոնսթրաքշն» ՍՊԸ-ն Անաստաս Միկոյան 64 հասցեում դեռևս 2019 թվականին էր ստացել 6 հատ 18 հարկանի շենք կառուցելու շինթույլտվությունը։ Առայսօր այն շահագործման չի հանձնվել՝ չնայած բնակիչների մի մասն արդեն ապրում է այդ շենքերում։

Քաղաքապետարանը նաև հայտնել է, որ շահագործման թույլտվության ստացմանը հնարավոր կլինի անդրադառնալ միայն բազմաբնակարան համալիրի աշխատանքային նախագծերով սահմանված տարածքի բարեկարգման աշխատանքների ավարտից հետո։