Կառավարության 2024 թվականի հոկտեմբերի 31-ի որոշմամբ «Հայաստանի ազգային ագրարային համալսարան» հիմնադրամից որոշ տարածքներ վերցվել են և անհատույց օգտագործման իրավունքով տրամադրվել «Հայաստանում ֆրանսիական համալսարան» հիմնադրամին:

Համալսարանի դասախոսները նոյեմբերի 1-ին ցույց էին անում` դժգոհելով, որ տարածքների օտարումը կխանգարի իրենց աշխատանքին։ Այնուամենայնիվ, որոշումը չփոխվեց։

Կառավարության այսօրվա նիստին ներկայացված հիմնավորման մեջ միայն նշվում է, որ տարածքների օտարումը էական դժվարություններ է առաջացրել Հայաստանի ազգային ագրարային համալսարանի բնականոն գործունեության ապահովման համար: ՀԱԱՀ-ից վերցվել է 40 լսարան, 7 ուսումնա-գիտական լաբորատորիա և 19 աշխատասենյակ։

Համալսարանի հոգաբարձուների խորհրդի  նիստում առաջացած անհարմարությունների լուծման տարբերակներ են քննարկվել՝ վերափոխել և բարեկարգել ՀԱԱՀ-ին ամրացված անբարեկարգ և չափսերով ու պայմաններով դասասենյակների, աշխատասենյակների ու լաբորատորիաների  չհամապատասխանող տարածքները, ինչպես նաև՝ տրամադրել նոր տարածքներ: 

2017 թվականին ՀՀ կառավարությունը որոշեց, որ Երևանի Կորյունի 15-17-19 հասցեներում գտնվող մասնաշենքերը (7594.5 քմ մակերեսով) այլևս չեն պատկանի Հայաստանի ազգային ագրարային համալսարանին։ Փոխարենը, ՀԱԱՀ-ին տրամադրվեց Մյասնիկյան 2 հասցեում գտնվող հանրակրթական դպրոցի շենքը՝ որպես ավագ դպրոցի։

Սակայն 2023 թվականի փետրվարի 9-ին Կառավարությունը նոր որոշում կայացրեց. նշված տարածքը փոխանցվեց Պետական գույքի կառավարման կոմիտեին, ապա՝ Մրցակցության պաշտպանության հանձնաժողովին։ Նախատեսվում է այդ տարածքը նորից տրամադրել ՀԱԱՀ-ին։

Ըստ հիմնավորման՝ անհրաժեշտ կլինի ուսումնասիրել շենքի տեխնիկական վիճակը։ Եթե հնարավոր լինի վերակառուցել, ապա կպատրաստեն փաստաթղթերը, եթե ոչ՝ կքանդեն ու նոր շենք կկառուցեն տեղում։ 

Լուսանկարը՝ Ագրարային համալսարանի կայքից