Երևանի ավագանին այսօր ընդունեց տեղական վճարների 2025թ. դրույքաչափերը սահմանելու մասին որոշումը, որով ամբողջությամբ նույնը մնացին 2024թ․-ին շեշտակի թանկացած «կարմիր գծերի»՝ վճարովի ավտոկայանատեղիների դրուքաչափերը: Այսինքն՝ քաղաքը դարձյալ բաժանվեց երկու գոտու՝ «Ա» և «Բ»։ Կարմիր գծերի «Ա» գոտում կայանման մեկ տարվա գինը սահմանվեց 160 հազար դրամ, իսկ «Բ» գոտում՝ 24 000 դրամ: Նույնն են մնացել նաև մեկ ժամվա, շաբաթվա և ամսվա համար դրույքաչափերը:

• «Ավտոկայանատեղում կայանելու համար վճարի դրույքաչափի բարձրացումը չի կարող կիրառվել որևէ փողոցի բեռնաթափման նպատակով»․ դատարանի որոշումը

Հիշեցնենք, որ 2024թ. դեկտեմբերի 19-ին, Վարչական դատարանը 5 դատավորի կազմով անվավեր ճանաչեց Երևան քաղաքի «կարմիր գծերի» համար սահմանված տեղական վճարին վերաբերող ավագանու որոշման դրույթները: Դատարանն արձանագրեց՝ քաղաքապետարանը որևէ ձևով չի ապացուցել, որ վճարը շեշտակի թանկացրել է ծառայությունների որակը բարելավելու նպատակով, իսկ փողոցները բեռնաթափելու պատճառաբանութունն իրավաչափ չէ:

Վարչական դատարանի վճռում նաև նշված է, որ տեղական վճարը և կոնկրետ դեպքում՝ համայնքային սեփականություն հանդիսացող ընդհանուր օգտագործման փողոցներում և հրապարակներում ավտոտրանսպորտային միջոցն ավտոկայանատեղում կայանելու համար տեղական վճարը համայնքի կամ համայնքի պատվերով մատուցած ծառայության համար անհրաժեշտ ծախսերի չափով փոխհատուցման վճար է, որի դրույքաչափը սահմանում է համայնքի ավագանին: Այդ դրույքաչափը չի կարող գերազանցել տվյալ ծառայության համար անհրաժեշտ ծախսերի չափը: Իսկ Երևանի քաղաքապետարանը չի ներկայացրել անհրաժեշտ ծախսերի հետ համեմատական վերլուծության տվյալներ:

Երևանի ավագանու ընդդիմադիր խմբակցությունների անդամները հետաքրքրվեցին, թե ինչն է պատճառը, որ քաղաքապետարանը նույն դրույքաչափերն է ներկայացրել 2025թ․-ի համար՝ հաշվի չառնելով Վարչական դատարանի որոշումը:

Երևանի քաղաքապետի տեղակալ Սուրեն Գրիգորյանը նշեց, որ առաջին դատարանի կայացրած որոշումը դեռ ուժի մեջ չի մտել, քաղաքապետարանը բողոքարկելու է, հետևաբար պետք չէ այն ներկայացնել որպես վերջնական իրողություն:

«Ես հավատացած եմ, եթե այդ որոշումը չընդունվեր, մենք հիմա շատ ավելի խայտառակ իրավիճակ էինք ունենալու»,- ասում է Ս. Գրիգորյանը, հավելելով, որ «կարմիր գծերի» կայանման վճարների թանկացումը երթևեկությունը բեռնաթափելու միջոցներից մեկն է եղել, ոչ միակը:

«Այս տարվա վճարների հաշվարկի հիմքում կա հստակ հաշվարկ՝ ինքնարժեքի մասով, որը ձեզ էլ հորդորում եմ դիմել, ստանալ գրավոր կարգով»,- նշեց քաղաքապետի տեղակալը:

«Մայր Հայաստան» խմբակցության ավագանու անդամ Գրիգոր Իսկանդարյանը Սուրեն Գրիգորյանից հետաքրքրվեց՝ եթե վարչական դատարանի որոշումը քաղաքապետարանը բողոքարկի, և վերաքննիչ վարչական դատարանը բողոքը չբավարարի, ստացվելու է, որ երկրորդ անգամ է տարվել թանկացման: Իսկ ինչ վերաբերում է հաշվարկներին, ապա ավագանու անդամը հույս հայտնեց, որ ասֆալտապատումը և այլ ծախսեր չեն դրվել կայանման դրույքաչափերի հիմքում, հակառակ պարագայում պարգևավճարները ևս կարելի է այդ համատեքստում դիտարկել:

Սուրեն Գրիգորյանը նշեց, որ դատարանը հիմք է ընդունել այն հանգամանք, որ որոշման տակ չի եղել հաշվարկ: Նա նշեց, որ նման հաշվարկ երբևիցէ չի եղել:

«Այսօր այդ հիմնավորումները կան, այլ հարց է, որ մեթոդաբանության հետ կարող եք համաձայն լինել կամ չլինել, դա էլ ձեր իրավունքն է»,- ավելացրեց Ս. Գրիգորյանը: