Կառավարությունն առաջարկում է փոխել 2020 թվականի հուլիսի 16-ին ընդունված օրենքը տեսալսողական մեդիայի մասին։

Գործադիրը կարծում է, որ օրենքի կիրառման որոշ խնդիրներ կան։ Օրինակ՝ հեռարձակման լիցենզիայի համար դիմելիս լրատվամիջոցը պարտքեր չպետք է ունենա։

ԱԺ-ում օրենքի քննարկման ժամանակ ոլորտի մի շարք մասնագետներ կարծիք էին հայտնում, որ այն շատ բացեր ունի։ Մասնավորապես, Կառավարությունը տեխնիկական ստանդարտներ պիտի սահմաներ։ Նոր փոփոխությամբ Ստանդարտացման և չափագիտության ազգային մարմինը կընդունի դրանք։

Կվերանայվեն նաև Կարգավորող մարմնի՝ Հեռուստատեսության եւ ռադիոյի հանձնաժողովի (ՀՌՀ) գործառույթները։ Այն պետք է վերահսկի տեխնիկական ստանդարտների պահպանումը։ ՀՌՀ-ն հնարավորություն կունենա նաև Հեռարձակողի հեղինակազրկման կամ լիցենզիայից զրկվելու դեպքում դիմել հեռարձակող մուլտիպլեքսին՝ հեռարձակումն անմիջապես դադարեցնելու։