«Եթե այսօր ձեռք են բարձրացնում սպայի վրա, բանակի վրա, վաղն էլ կարող են նախագահի
հետ դա անել, իհարկե, ոչ այս նախագահի: Պատկերացրեք, հենց այնպես, Բաղրամյանով
անցնելիս մտնեն նախագահի մոտ, մի երկու չափալաղ տան, դուրս գան»,- ահա այսպես, կեսկատակ-կեսլուրջ լրագրողների հետ հանդիպման ժամանակ «Հարսնաքարի» դեպքերի մասին խոսեց հայտնի երգիծաբան Վարդան Պետրոսյանը:

Հուլիսի 23-24-ին Պարոնյանի անվան երաժշտական կոմեդիայի թատրոնում իր նոր ներկայացման ժամանակ Վարդան Պետրոսյանը կանդրադառնա նաև «Հարսնաքարի» թեմային:

«Կան բաներ, որոնց երգիծական ժանրում չես կարող անդրադառնալ, մանավանդ, երբ վերքը դեռ թարմ է, սակայն այդ ողբերգական իրադարձությանն ընդհանրապես չանդրադառնալն ինձ համար ինքնախաբեություն կլինի: Ուղղակի, թե անուղղակի, պետք է խոսեմ այդ մասին: Ես համաձայն չեմ այն մտքին, թե դա հիմարության, բթության, անդաստիարակության արդյունք էր: Ինչ-որ բան արատավորված է մեր համակարգում, սակայն, ինչպես ասում են` գերանդին քարին է դեմ առել, կամ դանակը ոսկորին է հասել, և զարգացումներ անպայման կլինեն»:

Խոսելով «Պարոնայք 50/50» անվանումը կրող իր առաջիկա ներկայացման մասին` Վարդան Պետրոսյանն ասաց, որ արվեստն, ընդհանրապես, լուծումներ չի առաջարկում, բայց ցույց է տալիս ուղիներ, որոնցով մարդը կարող է գտնել իր ճանապարհը, և եթե դահլիճում գտնվող 700-800 հոգուց թեկուզ երկուսը կամ երեքը ինքնամաքրման զգացողություն ունենան, և ներկայացումը դիտելուց հետո իրենց կյանքում դրական փոփոխություններ նկատվեն, ուրեմն այն հաջողությամբ իր գործառույթը կատարել է: