Սահմանամերձ Փշատավան գյուղի խանութպաններից մեկը վերջերս ամենայն լրջությամբ հետաքրքրվեց, թե ինչ մեթոդ կարող ենք առաջարկել, որ բիզնես չունենա ու հետն էլ շատ արագ եկամուտ ստանա ու դրամական միջոցներ կուտակի: Երբ նշեցինք, թե անհնար է, նա սկսեց ծիծաղել. «Հարիֆ եք, պատգամավորներն ասում են՝ բիզնես չունենք, բայց իրանց փողերը միլիոններով են հաշվում: Գնացեք հարցրեք, թող ձեւն ասեն, հետո էլ ինձ կասեք»:

Դե արի խանութպան Արամին բացատրի, որ պատգամավորներն «ընտրյալ» են, նրանք գտնվում են իշխանության բարձր հովանու ներքո ու անհնար է համեմատվելը: Առավել եւս դժվար է հատիկով մաստակ, ձեթ վաճառող հողում աշխատելու ժամանակ արեւից երեսը վառված գյուղացի խանութպանին բացատրել, որ ինքը չի կարող մրցել շուկան մենաշնորհած «ընտրյալների» հետ, ավելին` իրեն չի ներվի, եթե 150 դրամանոց անձեռոցիկ վաճառելուց ՀԴՄ կտրոն չտրամադրի, էլ ուր մնաց բիզնես չունենալով հարստություն կուտակելու «տեխնոլոգիաները» յուրացնի:

«Գյուղացի ենք, գիտեն՝ բան չենք ջոկու՞մ, ու՞մ հաշվին են փողեր կուտակում, ու՞մ են էշի տեղ դնում»,- մի քանի անուններ թվարկելով՝ ասաց Արամը` դեմ տալով պարտքերի ցուցակը:

Իհարկե, հասկանում ես գյուղացու դժգոհությունը, որ ուզում է ընտանիք պահելու համար բիզնես զարգացնել, բայց ինչպես շատ գյուղացիներ, շարունակում է վարկերի տակ մնալ, քանի որ ինքը «ընտրյալ» չէ եւ պարտավոր է մաքուր աշխատել եւ հայտնվել մրցակցությունից դուրս:

Դե արի նրան բացատրի, որ, օրինակ, Ազգային ժողովի պատգամավոր Վարդան Այվազյանը այն բազմաթիվ պատգամավորներից է, ով երբեք չի թաքցնում, որ վայելում է հարազատ կուսակցության` ՀՀԿ-ի աջակցությունը բոլոր դեպքերում, հետեւաբար նրա հետ հասարակ մահկանացուն համեմատվելու իրավունք չունի:

Ինչպե՞ս կարող է Թուրքիայից մի քանի կիլոմետր հեռավորության վրա գտնվող գյուղացի խանութպանը հասկանալ, որ Վարդան Այվազյանի 2008 թ. հայտարարագրած 3 մլն 144 հազար110 դրամը մեկ տարի անց` 2009-ին, դառնալու է 3 մլն 147 հազար 700 դրամ, իսկ 2010 թվականին` 10 մլն 618 հազար 890 դրամ եւ 72 հազար դոլար:

Մի ոտքը հողում, մյուսը` փոքր խանութում տքնող գյուղացու աչքում, իհարկե «հարիֆ» կլինենք, երբ ասենք, որ 2011 թ. Վարդան Այվազյանը ձեռք է բերել 18 մլն դրամ արժողության «Reng Rover Sport» եւ 25 միլիոն դրամանոց «Bently» մակնիշի ավտոմեքենաներ, իսկ նրա կինը` Մարիամ Գինոսյանը` 14 մլն 225 հազար 731 դրամ արժողության «Mersedes E350» ավտոմեքենա:

Երբ Արամը «դեմ է տալիս» պարտքերի ցուցակը եւ նշում, թե 3 տարվա պարտքերը չի կարողանում հավաքել, Վարդան Այվազյանը 2011 թվականին հասցնում է կուտակել 46 միլիոն 148 հազար 380 դրամի եկամուտ, որից 43 մլն-ը փոխառություն է եւ մոտ 16,5 մլն դրամի բնամթերքով եկամուտ, իսկ կինը` 15 մլն դրամի եկամուտ, որից 14 մլն-ն է փոխառություն:

2011 թվականին ԱԺ ՀՀԿ-ական պատգամավորն ունեցել է 12 մլն 900 հազար դրամ եւ 72 հազար դոլար դրամական միջոց, կինը` 1 մլն դրամ:

Կարծում ենք՝ Արամը կհասկանա, թե ինչ տարբերություն կա իր ու Վարդան Այվազյանի միջեւ: