Արմավիրի մարզի Արմավիր համայնքի սեփականություն հանդիսացող հողամասերից 88 հեկտար կնվիրաբերվի «Հայաստանի մանուկներ» բարեգործական հիմնադրամին՝ մարզի բնակչության ու երեխաների համար բարեգործական ծրագիր իրականացնելու նպատակով։ Որոշումն ընդունվեց Կառավարության դեկտեմբերի 15-ի նիստում։

Արմավիր համայնքի Մյասնիկյան գյուղում, ինչպես նաև Բաղրամյան համայնքի գյուղերի բնակիչների համար կստեղծվի նոր՝ «ՔՈԱՖ ՍՄԱՐԹ» ուսումնական կենտրոն, Համագումարների կենտրոն, Միջոցառումների կենտրոն և սրճարան, նորարարական գյուղատնտեսության բազմակողմանի ծրագրեր և զարգացման նախաձեռնություններ, «ՔՈԱՖ ՍՄԱՐԹ» ջերմոցային տնտեսություն, ժամանակակից սպորտային համալիր, վերականգնողական էներգիայի կայան, նորարարական բիզնես գազափարների կենտրոն։

Մյասնիկյան գյուղում կստեղծվի հատուկ ավան՝ տեղանքն ու հիմնադրամի գաղափարախոսությունը բնութագրող ճարտարապետական լուծումներով։

Ինչպես նշված է նախագծի հիմնավորման մեջ, բարեգործական ծրագրի շնորհիվ կստեղծվեն նոր աշխատատեղեր։ Ծրագիրը կյանքի կկոչվի առաջիկա տասնամյակում: Հիմնադրամը ներդնելու է 5 մլրդ 492 մլն 207 500 դրամ։

Հիմնադրամն իր գործունեությունն Արմավիրի մարզում սկսել է 2004 թվականից՝ մարզի նախկին Քարակերտ համայնքում։

Հետագայում աշխատանքները ծավալել է հիմնականում Բաղրամյանի տարածաշրջանի ավելի քան 15 համայնքում՝ կառուցելով կամ վերակառուցելով կրթական, մշակութային, երիտասարդական, դաստիարակչական, երեխայի և ընտանիքի զարգացման կենտրոններ, մշակույթի տներ, հանրակրթական դպրոցներ եւ մանկապարտեզներ։