Երևան քաղաքի Նորք-Մարաշ վարչական շրջանում բարեկարգ մայթը ծանր տեխնիկայով քանդվել է։ Մայթը շուտով ավտոկայանատեղի կդառնա, քանի որ արդեն նախկին մայթին կից նախատեսվում է «Երևան սիթի» սուպերմակետ բացել։

Արմենակյան 143 հասցեում նորակառույց շենքի շինարարությունը դեռ չի ավարատվել, սակայն կառուցմանը զուգահեռ արդեն ապամոնտաժվել է նոր բարեկարգված մայթը։ «Հետքի» տեսախցիկն արձանագրել է մայթի ապամոնտաժումը։

Երևանի քաղաքապետարանն Արմենակյան 143 հասցեում «Սիամս» ՍՊԸ-ին բազմաբնակարան բնակելի շենքի կառուցման համար դեռևս նախորդ տարի (2021թ․-ին) շինթույլտվություն է տվել։ Շինարարությունը նախատեսվում է ավարտել 2023 թ.-ի նոյեմբեր ամսին։ Մինչ շինարարության ավարտը կառուցապատողը շինհրապարակի ցանկապատի վրա արդեն փակցրել է պաստառ, որն ազդարարում է «Երևան սիթի» սուպերմարկետի մոտալուտ բացումը։

Հոկտեմբերի 8-ին՝ ոչ աշխատանքային օրը, էքսկավատորով մի քանի ժամում մայթն ապամոնտաժվել է։ Բազալտե ծանր եզրաքարերը մի անկյունում էին կուտակել։

Արմենակյան փողոցի քանդված մայթի հարևանությամբ է գտնվում Նորք-Մարաշ վարչական շրջանի աշխատակազմը, նրա հարևանությամբ՝ մանկապարտեզ, եկեղեցի։ Այսինքն՝ մայթի ապամոնտաժումը հետիոտնի համար արդեն անհարմարություն է առաջացրել, եւ կարելի է պատկերացնել, թե որքան անհարմար կլինի, երբ մայթի տեղում մեքենաներ կայանեն։

Արմենակյան փողոցում սա առաջին մայթ-կայանատեղին չէ։ Նմանատիպ իրավիճակ է նաև «Սքայ» սոպերմարկետին հարող մայթի տեղում (Արմենակյան փողոցի միջնամաս)։

Ի դեպ, Երևանի քաղաքապետարանը 2020 թ.-ին «Եղնիկիպես» ՍՊԸ-ի հետ պայմանագիր էր կնքել, որ ընկերությունը 29 մլն դրամով վերանորոգեր Նորք-Մարաշ վարչական շրջանի փողոցների և մայթերի ասֆալտբետոնե ծածկը։ 

Մայթի ապամոնտաժման վերաբերյալ գրավոր հարցմամբ դիմել ենք Երևանի քաղաքապետարան, պարզաբանում ստանալուն պես այն կհրապարակենք։