Երեկ երեկոյան ՊՆ-ն հաստատեց սոցցանցերում տարածված այն տեղեկությունները, որ ադրբեջանական կողմը հրադադարի ռեժիմը խախտել է Կապանի Ներքին Հանդ գյուղի ուղղությամբ։ Ըստ գերատեսչության՝ որոշակի պարբերականությամբ Ադրբեջանի ԶՈւ ստորաբաժանումները խախտել են հրադադարի ռեժիմը` հայ-ադրբեջանական սահմանի արեւելյան ուղղությամբ կիրառելով հրաձգային զինատեսակներ: Ժամը 22:30-ի դրությամբ, ՊՆ-ի փոխանցմամբ, իրադրությունը սահմանին կայուն էր, կրակոցներ չկային:

Ներքին Հանդի վարչական ղեկավար Խաչատուր Բաղդասարյանը «Հետքին» փոխանցեց, որ մի քանի անգամ թշնամու կողմից կրակոցներ են արձակվել մինչեւ լույս գիշերվա ժամը 4-ը։ Բաղդասարյանի տեղեկացմամբ՝ բնակիչները Ներքին Հանդում են, սակայն լարվածությունը պահպանվում է։ Բաղդասարյանը հաստատեց «Հետքի» այն տեղեկությունը, որ թշնամու կրակոցներից հայկական կողմը մեկ վիրավոր ունի, սակայն նշեց, որ, իր տեղեկություններով, միջադեպը տեղի է ունեցել հարեւան գյուղի՝ Սրաշենի ուղղությամբ։ Խ․ Բաղդասարյանի ունեցած ինֆորմացիայի համաձայն՝ վիրավորը «Երկրապահ» կամավորականների միությունից է։ 

«Հետքի» մեկ այլ աղբյուրի տեղեկացմամբ՝ վիրավորը 1967 թ․ ծնված Ժորիկ Մարտիրոսյանն է (Շենգավիթ)։ Վիրավորումը ստացել է ազդրի շրջանում։ 

ՊՆ-ն որեւէ ինֆորմացիա չի հայտնել այս դեպքի մասին։ ՊՆ խոսնակ Արամ Թորոսյանը մեր հարցին, թե արդյոք հաստատում է, որ երեկվա միջադեպի հետեւանքով վիրավոր ունենք, պատասխանեց, թե նախարարությունը հայտնում է հակառակորդի կրակոցից վիրավորման ցանկացած դեպքի մասին։ 

Լուսանկարում՝ Ներքին Հանդը (արխիվ, հեղ․՝ Նարեկ Ալեքսանյան)