Նախագահ Վահագն Խաչատուրյանը երեկ` ապրիլի 28-ին, մարզերում առաջին ատյանի ընդհանուր իրավասության դատարանի քրեական մասնագիտացմամբ 8 դատավոր նշանակելու վերաբերյալ հրամանագիր է ստորագրել:

Ստորև ներկայացնում ենք, թե ովքեր են դատավոր նշանակված անձինք:

Այսպես՝ Հայկ Պետրոսյանը նշանակվել է Արարատի և Վայոց Ձորի մարզերի դատավոր: Պետրոսյանը մինչև դատավոր նշանակվելն աշխատում էր Գլխավոր դատախազության Հատուկ քննչական ծառայությունում մինչդատական վարույթի նկատմամբ հսկողության վարչությունում՝ որպես ավագ դատախազ:

Տարոն Թադևոսյանը նշանակվել է Լոռու մարզի ընդհանուր իրավասության դատարանի դատավոր: Վերջինս եղել է Քննչական կոմիտեի Լոռու մարզային քննչական վարչության Ստեփանավանի քննչական բաժնի պետ:

Լոռու մարզում դատավոր է նշանակվել նաև Մարտին Արզումանյանը: Նա աշխատել է Երևան քաղաքի դատախազությունում՝ որպես ավագ դատախազ:

Ռոման Սմբատյանը նշանակվել է Շիրակի մարզի ընդհանուր իրավասության դատարանի դատավոր: Վերջինս 2019-2020 թվականներին եղել է վարչապետի աշխատակազմի տեսչական մարմինների աշխատանքների համակարգման գրասենյակի կրթության, առողջապահության և աշխատանքի ոլորտների համակարգման և մեթոդաբանության վարչության պետը:

Շիրակի մարզում է նշանակվել նաև Արամայիս Ասատրյանը: Վերջինս Վերաքննիչ քրեական դատարանում դատավորի օգնական է եղել:

Շիրակի մարզում նշանակված մյուս դատավորը Էդուարդ Մկրտչյանն է: Վերջինս նույնպես Վերաքննիչ քրեական դատաանում դատավորի օգնական է եղել:

Մուշեղ Արամյանը դատավոր է նշանակվել Սյունիքի մարզում: Նա Երևան քաղաքի Ավան և Նոր Նորք վարչական շրջանների դատախազի տեղակալն է եղել:

Արամ Մարտիրոսյանը նշանակվել է Տավուշի մարզում: Մարտիրոսյանը եղել է Կոտայքի մարզի դատախազության ավագ դատախազ: