Շուրջ մեկ ժամ է' փորձում ենք կապվել ՀՀԿ-ի ներկայացուցիչների հետ, որպեսզի ճշտենք, թե երեկվա համերգի փուչիկները ՀՀԿ-ն որտեղից էր ձեռք բերել: Մինչ ՀՀԿ մամուլի խոսնակ Էդուարդ Շարմազանովի հեռախոսահամարն անհասանելի էր, փորձեցինք կապ հաստատել ՀՀԿ խմբակցության ղեկավար Գալուստ Սահակյանի հետ, վերջինս չի պատասխանում հեռախոսազանգերին:

ՀՀԿ շտաբի հեռախոսահամարներին նույնպես պատասխանող չկա: ՀՀԿ շտաբի անդամ, պատգամավոր Դավիթ Հարությունյանն ասաց, որ տեղյակ չէ կազմակերպչական հարցերին և չգիտե նաև, թե որտեղից են փուչիկները ձեռք բերել:

Ի վերջո կարողացանք զրուցել Է. Շարմազանովի հետ, ով նույնպես ասաց, որ տեղյակ չէ, թե ինչպես կամ որտեղից են ձեռք բերվել փուչիկները և ուղղորդեց դեպի ՀՀ արտակարգ իրավիճակների նախարարություն:

ԱԻՆ մամուլի քարտուղար Նիկոլայ Գրիգորյանն ասաց, որ «քննությունը կպարզի», թե որտեղից կամ ինչպես են ձեռք բերվել այդ փուչիկները և ինչով են լցված եղել:

Նշենք, որ ըստ ՀՀ ԱԻՆ տվյալների, ժամը 14.30-ի դրությամբ հոսպիտալացված 154 քաղաքացիներից 80-ը դեռևս գտնվում են հիվանդանոցներում, որոնցից 25-ը՝ վերակենդանացման բաժանմունքներում, իսկ 74-ը դուրս են գրվել:

Լուս.` a1plus.am-ի