Ռուսաստանի ոստիկանության աշխատակիցները քրեական գործեր են հարուցել Մոսկվայում Հայաստանի և Բելառուսի դեսպանատները պայթեցնելու սպառնալիքների մասին անանուն նամակներից հետո։ Այս մասին TACC գործակալությանը հայտնել է իրավապահ մարմիններում իր աղբյուրը։

«Քրեական գործեր են հարուցվել ՌԴ ՔՕ 207-րդ հոդվածի 2-րդ մասով («Ահաբեկչական գործողության մասին դիտավորյալ կեղծ հաղորդում»)»,- ասել է գործակալության զրուցակիցը։ Հոդվածի պատժամիջոցը նախատեսում է տուգանք 500-ից 700 հազար ռուբլու չափով կամ ազատազրկում՝ երեքից հինգ տարի ժամկետով։

Հիշեցնենք, որ անհայտ անձինք հայտարարել էին Մոսկվայում Հայաստանի և Բելառուսի դեսպանություններում պայթյուններ իրականացնելու մտադրության մասին՝ պահանջելով դուրս բերել զորքերը Ղազախստանի տարածքից։ 

«Նախօրեին հայտնի է դարձել, որ Հայաստանի և Բելառուսի դեսպանությունների էլեկտրոնային փոստերին պայթյունի սպառնալիքով նամակներ են ստացվել։ Անհայտ անձինք պահանջել են դուրս բերել զորքերը Ղազախստանի տարածքից»,- հայտնել էր TACC գործակալության զրուցակիցը։ 

Նրա խոսքով՝ շենքերն ուսումնասիրվել են, որևէ պայթուցիկ սարք կամ պայթուցիկ նյութ չի հայտնաբերվել։

Հիշեցնենք, որ ավելի վաղ Ղազախստանի նախագահ Կասիմ-Ժոմարտ Տոկաևը դիմել էր ՀԱՊԿ երկրներին՝ խնդրելով խաղաղապահ ուժեր ուղարկել Ղազախստան, ինչը պայմանավորված էր այդ երկրում ընթացող ներքաղաքական բախումներով և բողոքի ցույցերով, որի արդյունքում զոհվել է մի քանի տասնյակ մարդ։ 

Հայաստանը ևս իր անձնակազմն է ուղարկել Ղազախստան, որն այդ երկիր է հասցվել ՌԴ զինված ուժերի Իլ-76 ինքնաթիռով։ Կառավարության համապատասխան որոշումն հունվարի 6-ին ստորագրել էր վարչապետ Նիկոլ Փաշինյանը։ ՀԱՊԿ Հավաքական խաղաղապահ ուժերի կազմում ներգրավված 100 զինծառայողներից բաղկացած հայկական անձնակազմը արդեն իսկ անցել է իր առջև դրած խնդրի կատարմանը։

Լուսանկարը՝ Ռուսաստանում Հայաստանի դեսպանության ֆեյսբուքյան էջից