Հրազդան քաղաքի Ջրառատ թաղամասի 26/24 ընտրատեղամասում պարբերաբար կուտակումներ են լինում։ Ըստ հանձնաժողովի նախագահ Վլադիմիր Գյուրջյանի՝ իրավիճակը վերահսկելի է, բայց ներսում գտնվող ընտրողների թիվը գերազանցում է թույլատրելի 15-ը։ Կուտակումների պատճառով աղմուկ է ստեղծվում։

Ընտրողներից 84-ամյա Ամալյա Կուրեղյանը թոռան հետ էր եկել ընտրատեղամաս։ Տարեց կինը նշեց, որ օգնության կարիք ունի, իսկ քանի որ թոռն անչափահաս է, նրան պետք է օգնի մեկ այլ մարդ։ Հանձնաժողովի նախագահ Վլադիմիր Գյուրջյանն առաջարկեց ընտրողներից մեկի օգնությունը։

«Հեսա վերջացնի, գա ձեզ օգնի»,- ասում է նախագահը։

Մինչ այդ, մենք զրուցում էինք։ Ամալյա Կուրեղյանը միայնակ է բնակվում։ Նրան ուղեկցողը աղջկա դուստրն է։ 

«Ընտրությունից հետո էլի ինձ չեն հիշի, որ պետք եմ, հիշում են»,- ասում է կինը։

«Ո՞վ չի հիշի»,- փորձում եմ հասկանալ։

«Դե թեկուզ թաղապետարանը, թեկուզ իրանք»,- ավելացնում է նա ու ձեռքով ցույց տալիս հանձնաժողովի անդամներին։

Շուտով մի կին է մեզ մոտենում, բռնում Ամալյա Կուրեղյանի ձեռքն ու նրան ուղեկցում, որպեսզի վերջինս կատարի իր ընտրությունը։

Քվեախցի մոտ կնոջ փոխարեն ամեն բան անում է օգնողը, Ամալյա Կուրեղյանը ոչինչ չի խոսում, անգամ չի նայում քվեախցից ներս։

Քվեախցիկից դուրս գալուց հետո հարցնում եմ՝ կատարե՞ց իր ընտրությունը։ Ասում է՝ ում պետք էր՝ ընտրեցի։