Այսօր՝ նոյեմբերի 14-ին, ՏԻՄ ընտրություններ են Իջևան խոշորացված համայնքում:

Առաջադրված է քաղաքական 2 ուժ՝ ՀՅԴ-Ն և ՔՊ-ն։ 38/11, 38/12, 38/13  ընտրատեղամասերում ընտրողների հոսքը խաղաղ է, ընտրական գործընթացը՝ իր սովորական հունի մեջ։ Համեմատաբար ընտրողների ակտիվություն էր նկատվում 38/15 ԸԸՀ-ում։ Այստեղ 1341 ընտրողից ժամը 12-ի դրությամբ ընտրել է 128-ը։

Ընտրատեղամասերում ամեն ինչ խաղաղ է, բայց տեղամասերի բակերում մարդիկ հավաքված ակտիվ զրույցների մեջ են։

-Ընտրությունից ընտրություն ենք հավաքվում, իրար տեսնում, գյուղացին երբ է պարապ որ, հազիվ ենք իրար տեսել,- բացատրում է Ենոքավանի բնակիչ Աշոտ Ստեփանյանը։

Աշոտ Ստեփանյան

Իսկ թե ինչ ակնկալիքներ ունեն ընտրություններից, պատասխանում են․

-Լավ բանի ակնկալիք չունենք։ Ով էլ ընտրվի, նույն բանն է։ Եկել եմ ընտրության, որ ուղղակի ձայնս չկորչի,- ասում է Սեյրան Այվազյանը։

Սեյրան Այվազյան

-Լավ հույսեր ունեմ էս ընտրություններից, մեր ժողովուրդը միշտ էլ լավատես է եղել, թող երիտասարդների ապագան լավ լինի,- ասում է Գրետա տատը։

Խաշթառակի 38/15 ընտրատեղամասում մուտքն ու ելքն առանձնացված էր․ ընտրողները մի դռնով մտնում էին տեղամաս, մյուսով՝ դուրս գալիս։ Գուցե դա նորմալ լիներ, եթե քվեախցիկները տեղադրված չլինեին անմիջապես ելքի դռան մոտ։

Նարինե Մաթևոսյան