«Գազպրոմ Արմենիա», «Զանգեզուրի պղնձամոլիբդենային կոմբինատ», Պաշտպանության նախարարության աշխատակազմ. խոշորագույն եռյակը

Հայաստանի 1000 խոշոր հարկատուները այս տարվա առաջին կիսամյակում (2021թ. հունվար-հունիս) միասին պետական բյուջե են վճարել 584 մլրդ 440 մլն դրամ:  Այս մասին տեղեկանում ենք Պետական եկամուտների կոմիտեից:

Խոշոր հարկ վճարողների ցանկում արդեն ներառվում են ոչ միայն բիզնեսները, այլև՝ որոշ պետական մարմիններ։ Այսինքն՝ հարկատուների ցանկը կազմվել է բոլոր հարկատուներից՝ անկախ կազմակերպաիրավական ձևից:

• ՊՆ աշխատակազմը՝ հանրապետության երկրորդ խոշոր հարկատու. նոր մեթոդաբանության արդյունքները

Այս նոր մեթոդաբանությամբ հաշվարկված համանման տվյալների համեմատությամբ տեսնում ենք, որ 2020 թվականի առաջին կիսամյակի համեմատ այս տարվա առաջին կիսամյակում խոշոր հարկ վճարողների վճարած հարկերի ծավալն աճել է մոտ 50 մլրդ դրամով կամ  9.3%-ով: 

Այսպիսով, այս տարվա առաջին վեց ամիսների տվյալներով հանրապետության խոշորագույն հարկատուն «Գազպրոմ Արմենիա» ՓԲԸ-ն է, որը պետական բյուջե է վճարել 28.4 մլրդ դրամի հարկեր։ Նախորդ տարվա նույն ժամանակաշրջանի համեմատ ընկերության հարկերի ծավալն ավելացել է 2.4 մլրդ դրամով կամ 9.4%-ով։

Երկրորդ տեղում հանքարդյունաբերող «Զանգեզուրի պղնձամոլիբդենային կոմբինատ» ՓԲԸ-ն է (ԶՊՄԿ)՝ 26.8 մլրդ դրամի հարկերով։ Ընկերության հարկերն ավելացել են 3.6 մլրդ դրամով կամ 15.6%-ով: ԶՊՄԿ-ն Հայաստանում պղնձի ու մոլիբդենի խոշոր արդյունահանողն ու արտահանողն է: Այս տարի միջազգային շուկաներում պղնձի գները էապես բարձրացել են, որն էլ նպաստել է ընկերության եկամուտների ու հարկերի աճին:

• Տնտեսական աճ՝ պղնձի ու տրանսֆերտների հաշվին

Հուլիսի 15-ին Խորհրդարանի արտահերթ նիստում առաջին ընթերցմամբ ընդունվեց «Պետական տուրքի մասին» օրենքում փոփոխություններ կատարելու նախագիծը, որով առաջարկվում է արտահանման լիցենզիոն տուրք սահմանել պղնձի և մոլիբդենի խտանյութերի ապրանքային դասակարգիչների նկատմամբ:

Ենթադրվում է, որ այս նախագծի ամբողջական ընդունման արդյունքում թե՛ ԶՊՄԿ-ի, թե՛ պղնձի ու մոլիբդենի արտահանմամբ զբաղվող մյուս հանքարդյունաբերողների վճարած հարկերն առաջիկայում պետք է ավելի մեծ տեմպերով աճեն:

• Պղնձի և մոլիբդենի խտանյութերի արտահանման համար պետական տուրք կսահմանվի

Եվ 2021 թվականի հունվար-հունիսին խոշոր հարկատուների առաջին եռյակը եզրափակում է «Հայաստանի Հանրապետության Պաշտպանության նախարարության աշխատակազմ»-ը, որը վեց ամսում պետական բյուջե է վճարել 25.4 մլրդ դրամի հարկեր, որի գերակշիռ մասը՝ 20 մլրդ դրամը, գոյացել է եկամտային հարկի գծով: 2020 թվականի նույն ամիսների համեմատ ՊՆ աշխատակազմի հարկերն ավելացել է 8.9 մլրդ դրամով կամ 54.1%-ով: 

Հաջորդում է ծխախոտի արտադրությամբ զբաղվող «Գրանդ Տոբակո» ՍՊԸ-ն՝ 12.9 մլրդ դրամի հարկերով: Ընկերության հարկերը զգալի կրճատվել են՝ 13.3 մլրդ դրամով կամ 50.7%-ով: Դատելով ծխախոտի արտադրության ու արտահանման ցուցանիշներից՝ այս շուկայում գործերը լավ չեն: 

2021 թվականի առաջին կիսամյակի խոշոր հարկատուների առաջին հնգյակը եզրափակում է ոսկու արդյունահանմամբ ու արտահանմամբ զբաղվող «Գեոպրոմայնինգ Գոլդ» ՍՊԸ-ն, որը պետական բյուջե է վճարել մոտ 12.4 մլրդ դրամի հարկեր՝ 3.5 մլրդ դրամով կամ 22.2%-ով պակաս, քան նախորդ տարվա նույն ժամանակաշրջանում:

Խոշոր հարկատուների տասնյակում են հայտնվել նաև ծխախոտի արտադրությամբ զբաղվող «Ինտերնեյշնլ Մասիս Տաբակ» ՍՊ ընկերությունը, որը ինչպեսև «Գրանդ Տոբակո»-ն, հայտնի գործարարներ Վարդանյանների ընտանիքին պատկանող «Գրանդ հոլդինգի» կազմում են:

 Տասնյակում են նաև Թեղուտի հանքը շահագործող «Թեղուտ» ՓԲԸ-ն և կապի խոշոր օպերատոր «ՄՏՍ Հայաստան» ՓԲԸ-ն (Վիվա-ՄՏՍ), ինչպես նաև վառելիքի խոշոր նեմուծողներ  «Սիփիէս Օիլ» և «Ֆլեշ» ՍՊԸ-ները: 

Նրանցից «Սիփիէս Օիլ»-ն և «Ֆլեշ»-ը տեսանելիորեն նվազեցրել են հարկերը, իսկ մյուս երեք հարկատուները՝ ավելացրել:

Այս տարվա առաջին կիսամյակում խոշոր հարկատուների առաջին տասնյակի հարկերն ու նախորդ տարվա ցուցանիշներն առավել մանրամասն կարող եք տեսնել այս ինֆոգրաֆիկայում: 

Ընդհանուր առմամբ, առաջին տասնյակի ընկերություններից վեցն ավելացրել են հարկերը, չորսը՝ նվազեցրել:

Այսպիսով, այս տարվա առաջին կիասմայկում խոշոր հարկատուների առաջին տասնյակի ընկերությունները միասին պետական բյուջե են վճարել 148 մլրդ դրամ, որը կազմել է 1000 խոշոր հարկատուների վճարած հարկերի ընդհանուր ծավալի 25%-ը: