«Ազատ Հայրենիք» դաշինքի թիմը ընտրարշավի շրջանակներում հունիսի 12-ին այցելել է Մարտունի, Վարդենիս, Գավառ քաղաքներ։ Այս մասին տեղեկացնում է դաշինքի ֆեյսբուքյան էջը։

«Նշված քաղաքներում քարոզչական երթերի ընթացքում քաղաքացիները դիմում էին դաշինքի ղեկավարներին և թեկնածուներին իրենց հուզող հարցերով։

Հարցեր ուղղվեցին բանակաշինության և քաղաքաշինության վերաբերյալ։

«Ազատ Հայրենիք» դաշինքի թեկնածու Դավիթ Հովհաննիսյանի պատասխանում հնչեցին հետևյալ թեզերը.

- Զինվորականների պրոֆեսիոնալիզմի մակարդակը բարձրացնելու համար անհրաժեշտ է ներդնել ռազմական պատրաստվածության եվրոպական չափանիշներ և պարտադիր զորակոչի տարիքը հասցնել 21-ի: Զինված ուժերի կառուցվածքը պետք է փոխվի այնպես, որ բարելավվի մարտական կառավարման որակը և ընդլայնվի տակտիկական ստորաբաժանումների մարտական կարողությունները: Հայաստանի ռազմական հայեցակարգը պետք է ունենա այն ելակետային մոտեցումը, որ երկրի անվտանգությունն ապահովելու համար անհրաժեշտ է ունենալ բավարար ռազմական հավասարակշռություն Ադրբեջանի և Թուրքիայի հետ: Ուստի հայկական զինված ուժերի ռազմական հզորությունը պետք է հավասար լինի Ադրբեջանի զինված ուժերի ռազմական հզորությանը և Թուրքիայի զինված ուժերի ռազմական հզորության 1/3-ին:

- Մայրաքաղաքը և նրա արբանյակային քաղաքները կդառնան ոչ նյութական արտադրության կենտրոն, իսկ նյութական արտադրությունը կապակենտրոնացվի տարածաշրջանային քաղաքային ագլոմերացիաներում: Մարզային քաղաքային կենտրոնները կապվելու են միմյանց և մայրաքաղաքի հետ ժամանակակից տրանսպորտային հաղորդակցության միջոցներով: Պետությունը կիրականացնի բնակչության բնակության պայմանների բարելավման ծրագիր, որը թույլ կտա անշարժ գույքի սեփականատերերին իրենց գույքի փոխանակման կամ վաճառքի միջոցով ձեռք բերել նոր ժամանակակից տներ զարգացած սոցիալական ենթակառուցվածքներ ունեցող շրջաններում»: