Ռուսաստանի Դաշնության նախագահ Վլադիմիր Պուտինը Россия 1-ին տված հարցազրույցում մեկնաբանել է Լեռնային Ղարաբաղի տարածքային պատկանելիության հարցը։

«Հայաստանը չի ճանաչել Լեռնային Ղարաբաղի անկախությունն ու ինքնիշխանությունը։ Դա նշանակել է, որ միջազգային իրավունքի տեսանկյունից և՛ Լեռնային Ղարաբաղը, և՛ հարակից բոլոր շրջանները համարվել են և համարվում են Ադրբեջանական Հանրապետության անբաժանելի մասերը»,- ասել է Ռուսաստանի Դաշնության նախագահը։

• Վլադիմիր Պուտին․ «Փաստաթուղթը հեղինակել ենք երեքով՝ ես, նախագահ Ալիևն ու վարչապետ Փաշինյանը»

Հայաստանի ցուցաբերված աջակցության վերաբերյալ հարցին Վլադիմիր Պուտինը պատասխանել է, որ Հավաքական անվտանգության պայմանագրի կազմակերպության (ՀԱՊԿ) անդամակցային պայմանները չեն պարտավորեցրել Ռուսաստանին միջամտել ռազմական հակամարտությանը։

«ՀԱՊԿ-ի պայմանագիրը նախատեսում է փոխադարձ օգնություն կազմակերպության անդամ երկրի դեմ ագրեսիայի դեպքում։ Հայաստանի Հանրապետության վրա ոչ ոք չի հարձակվել, և դա մեզ ոչ մի իրավունք չի տվել ուղիղ մասնակցություն ունենալ մարտական գործողություններին»,- նշել է Վլադիմիր Պուտինը։

Միևնույն ժամանակ ՌԴ նախագահը շեշտել է, որ Մոսկվան ամբողջությամբ կատարել է իր պարտավորությունները Հայաստանի հետ ռազմատեխնիկական համագործակցության շրջանակներում։

«Վստահեցնում եմ, որ Հայաստանը իրեն լքված և մոռացված չի զգացել։ Եվ Ռուսաստանը ամեն ինչ արել է, որ դա տեղի չունենա»,- Россия 1-ին տված հարցազրույցում ասել է Պուտինը։

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին է հանձնում Քելբաջարի, Աղդամի և Լաչինի շրջանները։ 

Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա:

Լաչինի միջանցքը (5 կմ լայնությամբ), որը ապահովելու է Լեռնային Ղարաբաղի կապը Հայաստանի հետ, ընդ որում շրջանցելով Շուշի քաղաքը, մնում է Ռուսաստանի Դաշնության խաղաղապահ զորակազմի վերահսկողության ներքո:

Լուսանկարը՝ РИА Новости / Алексей Никольский