Դատախազությունը պահանջում է ցմահ ազատազրկման դատապարտել 2016 թվականին ոստիկանության էրեբունու ՊՊԾ գնդի գրավման գործով ամբաստանյալ, երկու ոստիկանի սպանության մեջ մեղադրվող Սմբատ Բարսեղյանին:

Սմբատ Բարսեղյան

Արմեն Բիլյան

Երևան քաղաքի ընդհանուր իրավասության դատարանում, նախագահությամբ դատավոր Մեսրոպ Մակյանի, այսօր տեղի ունեցած դատական նիստի ընթացքում մեղադրական ճառով հանդես եկան մեղադրողները:

Մեղադրող Պետրոս Պետրոսյան

Մեղադրող Պետրոս Պետրոսյանը պահանջեց ամբաստանյալ Արմեն Բիլյանին դատապարտել 21 տարի ազատազրկման, Էդվարդ Գրիգորյանին, Գագիկ Եղիազարյանին և Արեգ Կյուրեղյանին դատապարտել 8 տարի 6 ամիս ժամկետով ազատազրկման, Պավել Մանուկյանին և Սեդրակ Նազարյանին դատապարտել 9 տարվա ազատազրկման, Մխիթար Ավետիսյանին և Վարուժան Ավետիսյանին` 8 տարի 9 ամսվա ազատազրկման:

Վարուժան Ավետիսյան

Ինչ վերաբերում է գործի դատաքննության ընթացքում մահացած Արայիկ Խանդոյանին, դատախազը դիրքորոշում հայտնեց, որ նրա նկատմամբ քրեական հետապնդումը ենթակա է դադարեցման՝ մահվան հիմքով: 

Հիշեցնենք, որ վերը նշված անձինք մեղադրվում են  2016 թվականի հուլիսի 17-ին կազմակերպված խմբի կազմում ապօրինի կերպով զենք պահելու, կյանքի և առողջության համար վտանգավոր բռնությամբ՝ շենքեր, շինություններ և տրանսպորտային միջոցներ զավթելու և պահելու մեջ՝ զուգորդված դրանք ոչնչացնելու, վնասելու սպառնալիքով, ինչպես նաև պատանդ պահելու, հրազեն ու ռազմամթերք հափշտակելու մեջ։

Նրանցից Սմբատ Բարսեղյանն,  թիվս վերը նշվածի, մեղադրվում է ՊՊԾ գնդի տարածքում երկու ոստիկանի՝ Արթուր Վանոյանի և Յուրի Տեփանոսյանի, իսկ Արմեն Բիլյանը՝ ոստիկան Գագիկ Մկրտչյանի սպանության  մեջ։

Լուսանկարները՝ Նարեկ Ալեքսանյանի