Առողջապահության նախարար Արսեն Թորոսյանի խոսքով՝ իր խնդիրն է մտածել, որ այն քաղաքացիները, որոնք ապրում ու աշխատում են Հայաստանում, ունենան ֆինանսական պաշտպանվածություն: Այս մասին այսօր խորհրդարանում լրագրողների հետ զրույցում  ասաց Թորոսյանը՝ անդրադառնալով պարտադիր առողջապահական ապահովագրության ներդրման համակարգի՝ նախարարության առաջարկին:

Հիշեցնենք, որ նախարարությունը հանրային քննարկման է ներկայացրել պարտադիր առողջապահական ապահովագրության համակարգի ներդրման նախագիծ, որով առաջարկվում է աշխատող քաղաքացիներից որպես հարկ գանձել աշխատավարձի 4-6 տոկոսը:

«Վաղ չէ՞ արդյոք ներդնել պարտադիր կամ համապարփակ առողջապահական ապահովագրություն․ այս հարցը տարբեր ժամանակներում ունեցել է տարբեր պատասխաններ, վաղ է որովհետև համակարգը պատրաստ չէ, երկրի ՀՆԱ-ն այդքան մեծ չէ, չկան համապատասխան ֆինանսավորման մեխանիզմներ»,-ասաց Թորոսյանը՝ հավելելով, որ միշտ էլ կարող են լինել որոշակի արդարացումներ համակարգի ներդրումը հետաձգելու համար, սակայն ըստ նրա՝ դա սխալ է:

Արսեն Թորոսյանը հարց  է հնչեցնում՝ արդյոք ուզո՞ւմ ենք, որ Հայաստանում ապրող քաղաքացիներն ունենան առողջապահական ծածկույթ, ապա հավելում, որ համակարգի ներդնումը կարող  է լինել փուլերով, օրինակ սկզբում՝ մեկ միլիոն բնակչության համար, հետո՝ կես միլիոն և այդպես շարունակ:

«Էդ փողերը հիմա ծախսվում է  առողջապահության վրա, շատ վատ ձևով է ծախսվում, մարդիկ տներ են ծախում, մեքենաներ ծախում, վարկեր վերցնում, մենք առաջարկում ենք փողերի հավաքման և ծախսման նոր համակարգ»,- ասաց նա:

Լրագրողի հարցին, թե ինչո՞ւ պետք է ինքը վճարի այն քաղաքացու առողջապահական ապահովագրության համար, որը թաքցնում է հարկեը, նախարարը պատասխանեց.

«Իսկ դուք դե՞մ եք, որ ձեր վճարած հարկերից տաքսիստների համար ճանապարհ կառուցեն, որոնք հարկ չեն վճարում, և հետո ով ասեց, որ հարկ չեն վճարում, կան ուղղակի և  անուղղակի հարկեր: Ցանկացած սպառող վճարում է հարկ, բոլորը հարկ են վճարում, կան ուղղակի եկամուտներից և անուղղակի՝ թեկուզ ստվերային եկամուտներից վճարվող հարկեր»: