Էկոնոմիկայի նախարարությունն առաջարկում է ներդնել «էլեկտրոնային կնիք», որը իրավաբանական անձանց հնարավորություն կտա մասնակցել Եվրասիական տնտեսական միության (ԵԱՏՄ) երկրներում, հատկապես Ռուսաստանի տարածքում իրականացվող պետական գնումներին։

Նախարարությունը նման առաջարկությամբ նախագիծ է քննարկման ներկայացրել իրավական ակտերի նախագծերի հրապարակման միասնական կայքում։

Ըստ Էկոնոմիկայի նախարարության՝ նախագիծը կազմվել է հաշվի առնելով իրականացված ուսումնասիրություններն ու տնտեսավարողների կողմից բարձրաձայնված խնդիրները։ 

Այժմ «Էլեկտրոնային փաստաթղթի և էլեկտրոնային թվային ստորագրության մասին» օրենքը սահմանում է, որ էլեկտրոնային փաստաթուղթը ստորագրող անձ է հանդիսանում ֆիզիկական անձը, որի անունով տրամադրվել է էլեկտրոնային թվային ստորագրության հավաստագիրը։ Օրենսդրությամբ ֆիզիկական անձին է տրամադրվում էլեկտրոնային կնիք, իսկ իրավաբանական անձինք զրկված են էլեկտրոնային կնիք ունենալու հնարավորությունից։ Էլեկտրոնային կնիք չունենալու պատճառով հայկական կազմակերպությունները (իրավաբանական անձինք) գործնականում չեն կարողանում մասնակցել ԵԱՏՄ երկրներում, մասնավորապես՝ Ռուսաստանում կազմակերպվող գնումներին։